Suno, Yamuna Ghaat Chale?

 

 

Suno,
firse Yamuna Ghaat chale? taarikh toh paar ho gayi wo wali, par Shahrukh Khan ki usi pose me dobara pictures khichwaye? firse bhaiya ko bolkr uss mandir ke paas nao ko rok kar waha saanp ke rehne ki baatein kare?

mai fir wahi ladki bankar aaungi jo kuch nahi bolti thi, akele baitha karti thi. pata h, mujhe bhi kaafi yaad aati h uski. wo din uske liye college life ki dusri shuruaat thi. dekhte hi dekhte ek undekha ant bhi aa gya uska.

mai fir sabki pictures lungi, aur tum sb mujhse aise baat krna jaise mujhe kaafi samay se jaante ho. tumlog fir hame chandni chowk le jaana, hm waha ke so called famous chhole bhature khayenge, fir sayad mahila haat kitaabe lene jayenge.

subah subah jab 5 bje mujhe akele ghar se nikalne me darr lagega, mai sab kuch bhul kar fir bhi chali aaungi. kya hua agar jisne joda usi ne toda. use bhul kar mai firse ek nayi shuruaat karungi.

maine suna h tumhe ab bhi fark padta h. sirf 1 saal aur bacha h hamaare paas. kya tum aise reh loge jaise February ka wo din kabhi hua hi nahi tha? rehna padega, na?

suno, firse wo saari yaadein banaye? mujhe un parindo ki aur pictures chahiye. iss baar chandni chowk me jalebi khayenge, okay? tum kehna mujhe logo se aur judna chahiye, mai bs dekh kar hs dungi, kyuki mujhe baatein krna nahi aata. ab jab maine baatein krna sikha, toh tumne baatien krna chod diya.

tumlog toh bahut ho. nadi ke uss paar, mai hu. nadi paar karwa doge? iss baar haath pakad ke na chodne ka wada karoge? akela rehna pasnd h mujhe, par iss baar ' bahut akeli rehti ho' bol kar akela toh nahi chod doge? samne se guzru toh mud kar toh dekhoge na? tum toh aaoge nahi puchne, sawalo se darr jo h tumhe. khair, chodo. bs…

suno,
ab mai kuch bolu, toh use sunoge?